Á lögreglustöðinni í Wick, nyrst í Skotlandi, hafði óralengi staðið rispuð flaska með bréfi í. Enginn gaf henni gaum eða velti fyrir sér hvað orðið þýddi sem mátti lesa gegnum glerið: HJÁLP.

Þegar Carl Mørck í Deild Q hjá dönsku lögreglunni fær flöskuskeytið í hendur telur hann að um barnabrek sé að ræða en því betur sem Assad aðstoðarmaður hans skoðar velkt skeytið, því betur átta þeir sig á skilaboðum þess, að tveimur drengjum hafi verið rænt á tíunda áratugnum. En hvaða drengir voru það og af hverju var hvarf þeirra aldrei tilkynnt? Smám saman flækjast Carl og Assad í net gáfaðs og tilfinningalauss mannræningja – sem reynist enn vera að.

Flöskuskeyti frá P er af mörgum talin  magnaðasta saga Jussi Adler-Olsen og hlaut Glerlykilinn sem besta norræna glæpasagan árið 2010.

****
„… vel samin bók og æsispennandi … Svo góð er þessi bók að það er ekki hægt að leggja hana frá sér ólesna …  einfaldlega besta spennusagan á markaðnum nú um stundir.“
Kolbrún Bergþórsdóttir / Morgunblaðið

* * * *
„Olsen er mikill sögumaður og vefur söguþráðinn af list. Sögur hans eru afburða afþreying …“
Páll Baldvin Baldvinsson / Fréttatíminn