Hús úr húsi er listilega fléttuð og spennandi skáldsaga um uppreisn gegn hversdagsleikanum og hina endalausu leit að ást og lífshamingju. Áhrifamátt sinn á hún ekki síst undir snjöllum umhverfis- og mannlýsingum.

„Allt mitt líf hefur verið fagurt.“ Þessi orð láta undarlega í eyrum Kolfinnu sem er nýflutt heim til mömmu sinnar eftir lánlausa sambúð og fær ekkert skárra að gera en leysa ólétta vinkonu sína af við þrif hjá misjafnlega hreinlátu fólki í Þingholtunum.

Það er óneitanlega ísmeygilegt starf að fara hús úr húsi og nostra við persónulega muni náungans enda vaknar húshjálpin smám saman til lífsins og dregst inn í stórfurðulega atburðarás. Þannig kynnist hún óperusöngkonu, fræðimanni og lögmanni, að ógleymdri hinni öldnu Listalín sem lumar á uppskrift að fögru lífi.

Hús úr húsi er önnur í röðinni af skáldsögum Kristínar Marju Baldursdóttur og hefur eins og aðrar sögur hennar notið mikilla vinsælda lesenda og gagnrýnenda.