Karitas án titils er dramatísk og áhrifamikil örlagasaga ungrar stúlku í upphafi 20. aldar, saga um drauma og þrár, óvænta hamingju, óbærilega sorg og miklar ástríður. Um leið er af einstöku innsæi brugðið upp mynd af lífi og hlutskipti kvenna fyrr og síðar.

Karitas Jónsdóttir elst upp í stórum hópi föðurlausra systkina. Móðir þeirra vill koma þeim öllum til mennta og þau þurfa að leggja hart að sér. En Karitas er margt til lista lagt og hana dreymir um öðruvísi tilveru. Fyrir tilviljun kynnist hún óvenjulegri konu með trönur og upp frá því tekur líf hennar að hverfast æ meir um tvö máttugustu öfl tilverunnar, listina og ástina.

Kristín Marja Baldursdóttir sló rækilega í gegn með fyrstu skáldsögu sinni, Mávahlátri, og eftir henni var gerð vinsæl kvikmynd. Kristín Marja er nú einn vinsælasti rithöfundur þjóðarinnar og sögur hennar koma út víða um heim.

Framhald á sögu Karitasar má lesa í bókinni Óreiða á striga.

„… ekki aðeins vel skrifuð saga af lífi listakonu á síðustu öld – hún á erindi við samtímann. … Og hún er mögnuð.“
Melkorka Óskarsdóttir / Fréttablaðið

„Greinilegt er að Kristín Marja hefur lagt á sig ómælda vinnu við að ná tíðarandanum og sú vinna skilar sér í ógleymanlegum mannlýsingum, svo og sannfærandi lýsingum á umhverfi, staðháttum og hugmyndafræði …“
Sigríður Albertsdóttir / DV

„… örlög sem fanga lesandann með þeim hætti að erfitt er að leggja bókina frá sér fyrr en að lestrinum loknum.“
Fríða Björk Ingvarsdóttir / Morgunblaðið