Við fornleifauppgröft í gömlu miðaldaklaustri í Noregi kemur hópur alþjóðlegra vísindamanna niður á lítið skrín úr skíragulli. Tvö þúsund ára gamalt. Skrínið er harðlæst en fornleifafræðingarnir vita að það geymir dýrmæta en ógnvekjandi leyndardóma. Leyndardóma sem breyta munu gangi sögunnar og skilningi manna á kristinni trú og vestrænni menningu verði þeim ljóstrað upp.

Voldug öfl svífast einskis til að varðveita þá leyndardóma sem skrínið geymir og varla er það komið upp á yfirborð jarðar þegar því er stolið. En Björn Beltö, ungur fornleifafræðingur sem starfar við uppgröftinn, kemur hinum ósýnilegu andstæðingum í opna skjöldu og við tekur æsispennandi eltingarleikur sem berst víða um lönd.

Við enda hringsins er skáldsaga sem heldur lesendum í heljargreipum, hún leiftrar af frásagnargleði og óvenjulegri þekkingu á launhelgum vestrænnar menningar. Við enda hringsins kom út tveimur árum á undan Da Vinci lyklinum og þykir sú síðarnefnda minna um margt á hana. Á snilldarlegan hátt fléttar höfundur hér saman ævafornar gátur menningarsögunnar í magnaðri frásögn.

Ögrandi og óvenjuleg spennusaga um ráðgátu sem varðar grundvöll lífs okkar.

Tom Egeland hefur skrifað nokkrar spennusögur og er jafnframt þróunarstjóri hjá TV 2 í Noregi.